Nagpaguwa si US President Donald Trump sang “last warning” sa Hamas militants nga paguwa-on na ang tanan nga nabilin nga hostages nga yara pa sa Gaza.
Suno kay Trump, wala sang bisan isa ka miyembro sang Hamas nga hilwayon sa katalagman kun indi pa gid pagsundon ang iya mandu.
“Release all of the Hostages now, not later, and immediately return all of the dead bodies of the people you murdered, or it is OVER for you,” suno sa US President. “Only sick and twisted people keep bodies, and you are sick and twisted!”
Nagpahayag man ini nga ipadala sini sa Israel ang tanan nga kinahanglanon para matapos na ang trabaho.Ginmanduan man ni Trump ang liderato sang Hamas nga magbiya na sa Gaza samtang may tiyempo pa.
“Not a single Hamas member will be safe if you don’t do as I say.”
Mangin ang mga tawo sa Gaza ang ginpalagtikan man sini nga matahum ang ila buwasdamlag, apang kun nagabulig sila nga magtago sang mga bihag, pamatyon man sila.
Indi ini ang una nga bes nga nagpaandam si Trump sa Hamas bangud sang Disyembre, ginsilingan man sini ang Hamas nga mamalayran gid sila kun indi pa mapaguwa ang mga bihag antes siya magpungko sa pwesto.
Ginapatihan sang Israel nga may 59 pa ka hostages nga nabilin sa Gaza kag 24 diri ang ginapatihan nga bangkay na.
Natabo ang statement ni Trump matapos ginkumpirma sang White House nga direkta na sila nga nagapakig-istorya sa Hamas para nga ma-release ang nabilin nga US-Israeli hostages kag tapuson na ang gyera sa Middle East.
Ini ang labing-una nga direct engagement sa tunga sang US kag Hamas halin sang 1997, tuig kun san-o gin-designate sang State Department ang amo nga grupo bilang isa ka foreign terrorist organization.
