Natalana nga magkit-anay kag mag-istoryahanay sanday US Defense Secretary Pete Hegseth kag Philippine Defense Secretary Gilberto Teodoro Jr. sa Manila sa Biyernes, Marso 28.
Suno sa Department of National Defense (DND), matabo ang pagsinapol sa Camp Aguinaldo sa Quezon City.
Una na nga naghatag sang kumpirmasyon ang US DND nga magabisita si Hegseth sa Pilipinas subong nga semana para nga mas mapabaskog pa ang alyansa kag partnership sang duha ka nasyon ilabi na para sa malinong nga Indo-Pacific region.
Antes mag-abot sa Pilipinas, mahapit anay ang American official sa Hawaii kag Guam; kag kun matapos na ang pagbisita sa Manila, iga-sunod sini ang Japan para sa komemorasyon sang 80th anniversary sang Battle of Iwo Jima.
Sa pihak nga bahin, antes pa man ang pag-abot ni Hegseth, nag-umpisa naman ang Philippine kag US militaries sang joint exercises kun sa diin involved ang 5,000 ka mga tropa halin sa duha ka mga pungsod.
Magalawig sang sinemana ini nga operasyon kag amo ang opening salvo sang Balikatan exercises nga natalana sa masunod nga bulan kag pagapasakupan sang navies kag air forces sang US kag Pilipinas.
