Gin-anunsyo sang administrasyon ni US President Donald Trump nga exempted ang smartphones, computers kag iban pa nga electronic devices sa “reciprocal” tariffs nga ipatuman sang Estados Unidos sang Amerika lakip na ang halin sa China.
Suno sa US Customs and Border Patrol, ini nga mga produkto ang excluded ukon wala ginlakip sa 10% global tariff nga gin-implementar sang president sa kadam-an nga mga pungsod kag sa Beijing.
Ini nga tikang ang kasunod sang mga kahangawa sang US tech companies nga magpanglakaak ang presyo sang gadgets ilabi na bangud kadam-an sa ila ang himo sang mga Chinese.
Lakip man sa exemptions suno sa notice nga ginpaguwa sang gobyerno amo ang electronic devices and components lakip ang semiconductors, solar cells kag memory cards.
Ginalantaw naman sang trade analysts nga makaginhawa na sang maayo ang dalagku nga tech firms kaangay sang Apple, Nvidia, Microsoft kag ang mas masangkad nga tech industry kasunod sini nga development.
Nahibaluan nga ang smartphones amo ang nagapanguna sa gina-import sang US halin sa China sang 2024 kag ginasundan sang Chinese-built laptops suno sa record sang U.S. Census Bureau.
