ILOILO CITY – Nangin tensyonado ang sitwasyon sa tunga sang isa ka lady driver kag duha ka traffic enforcers sa Tabucan, Mandurriao, Iloilo City.
Nag-umpisa ang ila pag-baisay pasado las 4:00 kahapon sang hapon kag natapos naman ini pasado las 8:00 kagab-i.
Sa Facebook live sang social media user nga si Furl Lab, ginbutangan niya ini sang caption nga, “Traffic enforcer na mga buaya d sa Tabucan, Mandurriao.”
Suno sa natungdan, ginapahog siya sang duha ka mga traffic enforcers nga ipadakop kag ipapreso gilayon.
“Sir, Indi ko ya maghatag sang lisyensya kay wala ko ya sang may ginlabag nga batas.”
Nanindugan ang lady driver nga wala siya sang may ginlapas nga layi rason nga indi siya maghatag sang iya driver’s license.
Ginkwestyon man sini kun ano nga pagsulundan sang Land Transporation Office (LTO) nga nagadumili sa pagsaylo sang linya.
Gintawag man sini nga buwaya ang mga traffic enforcers bangud sa pagdakop sa iya.
“Kapila na ni may nag-agi nga mga motorists, hambal nila amo na mga buwaya kamo.”
“Amo gid man na di sila sa Tabucan, Mandurriao, mangita gid ni sila sang ila mga kalan-on.”
Gindugang man sang lady driver nga nahibaluan sini ang layi bangud yara sa cybercrime nagatrabaho ang iya utod.
Apang sa bahin naman sang traffic enforcer, iya ginpahayag nga nagsaylo sang linya ang lady driver sa diin apisar yara ini sa left lane, apang sang nag-green na ang traffic light, nagsaylo ini sa right lane.
Sa ulihi, nag-abot ang police kag ginapamatian ang duha ka bahin.
Matapos ang apat ka oras, ginhatagan sang citation ticket ang lady driver kag ginmultahan sang P200.00
