Nagapati si Vice President Sara Duterte nga may lamod-pamulitika ang mandu ni President Ferdinand Marcos Jr. nga imbestigaran ang PrimeWater Infrastructure Corp. nga ginapanag-iyahan sang mga Villar.
Suno sa bise-presidente, posible nga amo man ini ang rason bangud base sa iya nakit-an, pulitika man ang tanan nga rason sang hulag sang administrasyon sa baylo nga para kuntani sa kalinong kag pag-umwad.
“Malamang, dahil lahat naman ng galawan ngayon ng administrasyon ay dahil sa pulitika. So wala na akong nakita na ginawa ng administrasyon na ito para sa kapayapaan at kaunlaran ng ating bayan,” pahayag sini.
Posible suno kay Sara nga kaangot ini sa iya pag-endorso kay Las Piñas Rep. Camille Villar sa pagka-senador. Nahibaluan nga si Camille ang myembro man sang Alyansa senatorial slate nga gina-endorso man ni Marcos.
Sa nauna nga pahayag sang Malacañang sang Abril 30 paagi kay Undersecretary Claire Castro, ginsiling nga wala sang ligwa sa Marcos administration ang mga kakulangan sa serbisyo: “Ang kakulangan sa serbisyo ay walang puwang sa administrasyon ni Pangulong Marcos Jr…mag-uutos po ang Pangulo na maimbestigahan po.”
Una naman nga nagpahayag si House Assistant Majority Leader Jay Khonghun nga maga-file siya sang resolution para magduso sang full-blown investigation sa lapses sang PrimeWater kun mag-resume na ang session sa Congress sa Hunyo.
