Gin-surrender sang isa ka barangay tanod sa Alimodian Municipal Police Station ang iya ginahuptan nga indi lisensyado nga armas.
Ang 48-anyos nga tanod ang residente sang Barangay Bulod sa amo nga banwa.
Sa interview sang Bombo Radyo kay Police Captain Marion Asparo, hepe sang Alimodian Municipal Police Station, iya ginpahayag nga isa ka unit sang 12 gauge homemade long barrel bolt action shotgun nga wala sang serial number ang gintugyan sang tanod sa pulisya.
Ginpahayag sini nga madugay na ang armas sa iya possession bilang pagpangaman bangud sa presensya sang New People’s Army (NPA) sa Alimodian sang una. Gindugang sini nga wala man sini nagamit ang pusil, kag gin-turn over nalang sa pulis bangud nalakip naman ang Alimodian sa mga banwa nga hilway na sa impluwensya sang mga rebelde nga grupo.
Kabahin ini sang kampanya sang pulisya nga Oplan Tokhang Kontra Armas Luthang kag iga-presentar man sa Alimodian Local Government Unit kaangot sa programa nga “Armas Luthang Baylo Bugas”. Ini nga programa nagahaylo sa firearm holders/gun owners sa Municipality of Alimodian nga i-surrender ang ila unlicensed/loose firearm kabaylo sang bugas agud nga malikawan ang mga kriminalidad sa banwa.
