Ginpatpat sang Iloilo City General Services Office (GSO) ang mga rason sa likod sang madasig nga pagbaha sa pila ka lugar sa syudad kasunod sang gulpiyada nga pag-inulan-ulan sa syudad.
Sa interview sang Bombo Radyo kay Engineer Niel Ravena, head sang General Services Office (GSO), iya ginpahayag nga lakip sa mga nagatuga sang clog sa drainage system amo ang sebu ukon mga nagmala nga used oil sang mga estabilsyemento.
Suno kay Ravena, nagkoordinar na sila sa City Engineer’s Office agud preparahan ang mahimo nga tikang lakip na ang declogging sang drainage system sang syudad.
Ginpahayag man sini nga ginsapol na sang talatapan ang mga street sweepers nga itudlo ang mga drainage nga naga-clog ukon mahinay ang ilig sang tubig-kanal.
Gintuad naman sang natungdan nga may pila ka drainage sa Sunburst Park sa City Proper ang naga-clog na.
Ginpasigurado naman ni Ravena nga ginatutokan sang pollution control officers sang talatapan ang nasambit nga mga problema sa drainage.
