Nakaboto lang antes ginbawian sang kabuhi ang isa ka senior citizen sa Oas, Albay.
Santo sa kumpirmasyon sang Police Regional Office Bicol (PRO V), na-identify ang tigulang nga si Nestor Rensales, 65.
Nakatapos si Rensales sa iya pagboto 6:05 kaina sang aga, apang nalipong ini samtang yara sa polling precinct sa Oas South Central School sa Barangay Ilaor Sur.
Suno kay Police Lt. Col. Maria Luisa Calubaquib, spokesperson sang PRO-5, naatake sa korason ang tigulang.
Naghingagaw pa ang mga medical personnel sang Commission on Elections (Comelec) nga yara sa area agud mahatagan sang first aid si Rensales kag gindala man ini sa Josefina Belmonte Duran Albay Provincial Hospital sa Ligao City.
Apang pag-abot sa ospital, gindeklarar ini nga ginbawian gid sang kabuhi.
Nahibaluan nga alas singko tubtub alas syete sa aga ang tion nga ginhatag sang Comelec sa vulnerable sector kaangay sang senior citizens, persons with disability (PWDs), kag pregnant women agud makaboto.
Tuman man ka init ang tyempo subong nga adlaw kadungan sang eleksyon rason nga binudlayan ang madamo nga mga botante indi lang sa Albay kundi sa madamo nga parte sang Pilipinas.#
