Ginplastar sang Department of Agriculture (DA) nga kinahanglan pa ang duha tubtub tatlo ka tuig antes makabalik ang populasyon sang baboy sa Pilipinas sa lebel sini antes nag-abot ang African Swine Fever (ASF) outbreak.
Suno ini kay DA spokesperson Assistant Secretary Arnel de Mesa.
Apang dugang sang Agriculture official, may mga nakit-an na subong nga senyales sang pagbangon sang local hog industry.
Suno sa iya, nagapadayon ang pagpatigayon sang controlled vaccination sa mga baboy kag maathag gid nga maayo ang resulta.
Nagahulat na lang ang ahensya suno sa iya sang approval sang Food and Drug Administration (FDA) para sa commercial rollout sang bakuna para sa ASF.
Kinahanglan gid ini nga approval antes i-implementar ang repopulation plan nga amo ang ginalantaw nga magabalik sang domestic production sang baboy sa Pilipinas sa lebel nga kaangay sang 2018.
