May plano bala ikaw nga magbyahe sa Hunyo?
Lauman nga mas manubo ang airfare sa masunod nga bulan kasunod sang anunsyo sang Civil Aeronautics Board (CAB) nga nag-us-os ang fuel surcharge level para sa domestic kag international flights.
Sa advisory sang CAB, ginsiling nga ang passenger kag cargo fuel surcharge para sa flights diri sa Pilipinas kag pakadto sa luwas sang pungsod ang na-set sa Level 3.
Halin ini sa June 1-30, 2025 nga mas manubo sa current Level nga 4.
Sa idalom sang Level 3, ang mga pasahero sa domestic flights ang magadugang sang bayad nga P80 tubtub sa P300, kag P273.36 tubtub sa P2,032.54 naman sa flights nga halin sa Pilipinas kag pakadto na sa iban nga mga nasyon.
Tandaan nga ang fuel surcharge isa ka optional fee, magluwas pa sa base fare, nga amo ang ginapasa sang airlines sa mga pasahero agud nga maka-recover sa gasto nga nakuha sa volatility sang jet fuel.
Ang price movement sa sini nga jet fuel amo man ang salandigan kun may adjustments nga himuon ang CAB sa fuel surcharges.
Sandig pa sa abiso sang CAB, dapat nga mag-file na sang application ang airlines nga gusto mag-kolekta sang fuel surcharge para sa Hunyo — antes ukon mismo sa effectivity period nga nakasaad sa advisory.
(RUSSELL PALMA/PHOTO)
