Gin-ako sang Land Transportation Franchising and Regulatory Board (LTFRB) Region VI nga indi madali-dali nga mahatagan sang prangkisa ang motorcycle taxi ukon habal-habal nga nagabyahe.
Sa interview sang Bombo Radyo kay Atty. Salvador Jun Altura, Legal Counsel sang Land Transportation Franchising and Regulatory Board Region 6, iya ginpahayag nga nagakinahanglan sang maid-id kag madalom nga pagtuon antes nga mahatagan sang prangkisa ang mga habal-habal.
Suno kay Altura, ang tikang ang mahimo makaapekto sa transport sector bangud makabig man ini nga bag-o nga kompentensya sang mga public transport sa dalan.
Aminado man ang natungdan nga indi na madula sa Iloilo ang pila ka mga rider nga nagapamasahero apisar sang wala sang prangkisa ga makabig nga colorum.
Gintuad man niya nga madasig matumod kon iligal ukon wala sang prangkisa ang rider paagi sa ila nga plate number.
