Pasado na sa third and final reading sa Kamara ang pagpalawig sa termino sang elective barangay kag Sangguniang Kabataan (SK) officials sa anum ka tuig.
Sa plenary session subong nga Lunes, 153 ka mga kongresista ang nagpabor sa House Bill (HB) No. 11287, apat ang negative, kag isa ang nag-abstain.
Sa idalom sini nga hagna, amyendaran ang Section 42 sang Republic Act No. 7160 agud patigayunon ang masunod nga barangay and SK elections sa ikaduha nga Lunes sang Mayo 2029, samtang ang elected barangay officials ang magaserbe naman sang six-year terms sa baylo sang subong ginasunod nga tatlo ka tuig.
Sa idalom sini nga hagna nga ang principal author amo si House Speaker Martin Romualdez kag iban pa nga House leaders, nakasaad nga wala sang elective barangay official ang magaserbe sang masobra sa duha ka consecutive terms sa kapareho nga posisyon; kag dapat nga wala man sang elective SK official ang magaserbe sang masobra sa isa ka termino.
Sa sini nga measure, ang incumbent Barangay and SK officials nga naeleher sang nagligad nga October 30, 2023 ang magapabilin sa posisyon tubtub sa masunod nga eleksyon sa Mayo 2029 MAGLUWAS LANG kun kakason ukon i-suspend bangud sa pila ka mga rason.
Matandaan nga sang Enero, sa Senado, gin-aprubahan man sa third and final reading ang Senate Bill 2816 nga naga-set sang term of office sang elected barangay officials kag SK members sa apat ka tuig.
Sa bersyon sang Senado, may limit nga three consecutive terms sa kapareho nga posisyon para sa barangay officials. Sa amo nga Senate bill, ginsiling nga ang masunod nga regular barangay and SK elections ang himuon sa una nga Lunes sang October 2027.#
