Nagsigabong ang Islamic Republic of Iran Broadcasting (IRIB) building samtang naga-live broadcast ang isa ka babaye nga presenter.
Antes ang pag-atake, ginapakamalaot sang anchor nga si Sahar Emami ang ginahimo sang Israel kag gintawag ini nga “aggression against the homeland.”
Nabatian ang pagsiyagit sa background, naghalin ang presenter sa live broadcast, kag nagdulom ang palibot. Indi pa klaro kun ano ka daku ang nabilin nga halit sini, apang nag-resume man ang live coverage pagkatapos sang insidente.
Natabo ang atake matapos nag-isyu sang paandam ang Israeli military sa District Three sang Tehran kun sa diin nahamtang ang headquarters sang state broadcaster. Nagpahayag pa si Defense Minister Israel Katz: “The Iranian propaganda and incitement mouthpiece is on its way to disappear.”
Nagpaguwa naman sang statement si Iranian foreign ministry spokesman Esmaeil Baqaei kun sa diin gintawag sini nga “wicked act” kag “war crime” ang ginhino sang Israel.
Nagpanawagan ini sa United Nations Security Council (UNSC) agud nga tapnaon na ang ila gintawag nga “genocidal aggressor” sa paghimo sang dugang nga kalakasan sa mga tawo sa Iran.
Sa statement naman sang Islamic Revolutionary Guard Corps, ginkondenar sini ang ginhimo sang Israel kag gintawag nga indi makatawo, kriminal, kag isa ka akto sang terorismo.
Ini na ang pang-apat nga adlaw sang masingki nga bayluhanay sang atake sa tunga sang Israel kag Iran.
