Buhion liwat ni Pope Leo XIV ang ginatos na ka tuig nga tradisyon sang mga Santo Papa paagi sa iya pagpahuway sa Castel Gandolfo sa Italya sa Summer.
Magabakasyon ang Santo Papa halin sa Hulyo 6 tubtob Hulyo 20 sa amo nga lugar nga isa ka oras ang biyahe halin sa Roma.
Sa banwa nga ini, ginabanta 8,900 nga mga residente nga nahamtang sa baybayon sang Lake Albano.
Ang alkalde sang banwa kag mga negosyante nagalaum nga ang pagtinir ni Pope Leo (nga amo ang una nga pagbisita sang isa ka Papa sa sulod sang 12 ka tuig) ang magapadamo sang mga turista nga luyag makakita sang bag-o nga lider sang Roman Catholic Church.
Nahibaluan nga nagapanag-iya ang Vatican sang papal palace sa amo nga banwa lakip na ang Renaissance-style gardens halin pa sang 1596. Apang sang tion ni Francis, wala ini nagbakasyon kag nagpili nga sa iya puluy-an sa Vatican magatinir bisan nga summer.
Bisan pa ginapaabot nga indi man masyado makita si Leo sa publiko, may kahigayunan gihapon ang mga tawo nga makakita sa iya sa mga relihiyoso nga selebrasyon sa Hulyo 13 kag Hulyo 20.
Nahibaluan nga madamo na nga Santo Papa antes kay Pope Francis ang nagbakasyon sa Castel Gandolfo kun sa diin mas malamig ipaanggid sa Rome. Nagalab-ot sa 37 degrees Celsius (99 degrees Fahrenheit) ang temperatura sa Roma kun summer.
