Ginpaguwa ni Mayor Raisa Treñas ang Executive Order No. 018 nga naga-deklarar sang kada Sabado bilang Clean-Up Day sa bilog nga syudad sang Iloilo.
Ang ini nga inisyatibo magasugod sa Hulyo 12, 2025, halin alas 7:00 sang aga tubtob alas 11:00 sang udto, kag target sini nga tinluan ang mga drainage, stagnant nga tubig, basura, kag iban pa nga lugar nga posible puy-an sang lamok kag ilaga.
Ginpahayag sa interview sang Bombo Radyo kay Joy Fantillaga-Gorzal, tagpamaba ni Mayor Treñas, nga ginpasulod ini nga tikang bilang kabahin sang preparasyon sa panahon sang tig-ululan kun sa diin nagataas ang risgo sang mga masakit pareho sang dengue, leptospirosis, kag iban pa nga dala sang lamok kag ilaga.
Ginapanawagan sang alkalde ang partisipasyon sang tanan nga Ilonggo sa ila tagsa ka panimalay kag komunidad, agud magbinuligay sa pagpanglimpyo sang palibot.
Ginasugid man nga ang mga barangay nga nagakinahanglan sang teknikal nga bulig ukon kagamitan, pwede magpadala sang sulat sa opisina sang alkalde agud mabuligan sang mga ahensya sang City Hall.
Luyag sang liderato ni Mayor Treñas nga mapabaskug ang kampanya para sa mas malimpyo, mayo nga ikaayong-lawas, kag malinong nga Iloilo City.
Ginpabutyag pa nga ang paglimpyo indi lang ubra sang gobyerno, kundi trabaho sang tanan nga pumuluyo sa syudad.
