Nagapadayon ang madalom nga imbistigasyon sa kaso sang nasapwan-patay nga pulis sa sulod sang Barotac Nuevo Municipal Police Station.
Ang biktima amo si Police Staff Sergeant Richard Velez, 36, pamilyado kag residente sang Brgy. Acuit, Barotac Nuevo, Iloilo.
Sa interview sang Bombo Radyo kay PMAJ Rolando Araño, spokesperson sang Iloilo Provincial Police Office (IPPO), iya ginpahayag nga na-assign sa Barotac Nuevo MPS si Velez humalin pa sang tuig 2022, kag nangin Chief sang Finance Section.
Suno kay Araño, ginporma na sang Office of the Provincial Director ang Special Investigation Task Group agud mapadasig ang imbistigasyon tuhoy sa insidente.
Samtang, ipa-idalom naman sa autopsy ang bankay sang biktima agud mahibaluan ang rason sang iya kamatayon.
Una na nga ginkumpirmar nga may pilas ang biktima sa tuo nga bahin sang iya ulo.
Na-recover man sa iya kilid ang firearm nga Taurus TS9 pistol (9mm) kag may isa ka basiyo sang bala.
Sa subong, padayon pa ginatipon sang mga otoridad ang mga ebidensya kag impormasyon nga makabulig sa kaso.
