Ginkilala sang Malacañang nga isa ka positibo nga ‘development’ ang pinakaulihi nga resulta sang survey nga nagapakita sang pagsaka sang approval rating ni Presidente Ferdinand Marcos Jr.
Suno kay Palace Press Officer Claire Castro, nagakahulugan ini nga nakita sang pumuluyo ang pagpangabudlay sang Presidente sa iya mga obligasyon sa nasyon.
Apang ginpahayag man sang Palasyo nga indi magpa-apekto si Presidente Marcos Jr. sa resulta sang survey ukon mga numero; sa baylo, magapadayon siya sa pagtuman sang iya mga katungdanan bilang lider sang pungsod.
Suno kay Castro, indi dapat magsalig gid sa survey bilang basehan sang performance.
Sa survey nga ginpatigayon halin Hunyo 27 tubtob 30, nalab-ot ni Marcos ang 25% approval rating sa ikaduha nga quarter sang tuig , mas mataas sang 19% kumparar sa nauna nga quarter, samtang ang disapproval rating niya nagnubo sa 47% halin sa 57%.
Ginpahayag pa gid ni Castro nga bisan ano pa man ang resulta , manubo man ukon mataas padayon lang ang trabaho ni Presidente Marcos Jr. para sa ikaayo sang banwa.
