Ginaduso ni Senador Alan Peter Cayetano ang Senate Bill No. 418 ukon Enhanced Batas Kasambahay Act nga nagatuyo maghatag sang dugang nga benepisyo kag proteksyon sa mga kabulig sa pungsod.
Sa idalom sang nasambit nga hagna, igahatag sa mga kabulig ang libre nga bulong, access sa edukasyon, kag mas istrikto nga pagpapatuman sang ila mga katungdanan kag kinamatarong.
Gina-rekomendar man sang hagna nga ang mga kabulig hatagan sang indi magnubo sa isa ka oras kada adlaw ukon anom ka oras kada semana para sa skills training ukon alternative learning, nga kabahin sang ila bayaran nga oras sa trabaho.
Sa pagpalig-on sang online learning, ginamanduan ang Department of Labor and Employment (DOLE) nga maglunsar sang programa para maghatag sang internet-enabled nga mga device sa mga kabulig.
Ginaduso man ang pagpatukod sang Kasambahay Education Inter-Agency Committee nga pagabug-usan sang DOLE, TESDA, DepEd, kag CHED.
Ang komitiba amo ang magadihon sang mga practical nga modules, siguruhon nga may access apisar pa may teknikal nga kabudlayan, kag balansehon ang katungdanan sang amo kag kabulig.
Dugang pa, ginapabakod sang hagna ang obligasyon sang mga amo nga irehistro ang ila kabulig sa SSS, PhilHealth, kag Pag-IBIG.
May yara man sang dugang nga suporta para sa mga kabulig nga naga-experyensya sang abuso ukon pagpang-abuso.
