Gin-report sang Iloilo City Health Office (CHO) nga masobra na sa 46,000 ka mga indibidwal ang nahatagan sang doxycycline prophylaxis treatment sa syudad agud malikawan ang leptospirosis subong nga may mga pagbaha dala sang habagat.
Ang may pinakadamo nga nabaton as of July 25 amo ang distrito sang Arevalo kun sa diin naglab-ot sa masobra sa 8,400.
Nahibaluan nga ginapanagtag sang District Health Centers kag Barangay Health Workers ini nga libre nga bulong agud malikawan ang mga balatian dala sang baha.
Nagpahanumdom man ang opisina sa mga tawo nga nakaubog sa tubig-baha nga mag-inom sang doxycycline sa sulod sang 72 oras agud nga mabuhinan ang risgo sang impeksyon.
Base sa report sang CHO, halin sa Enero 1 tubtub sa Hulyo 19, nagdangat na sa 16 suspected kag pito ka probable cases ang na-rekord kag tatlo ang patay.
Suno kay City Health Officer Dr. Mary Ann Diaz, kadam-an sa mga kaso amo ang mga naga-trabaho sa merkado, samtang ang isa ka fatality ang nagpamalibad nga mag-inom sang doxycycline.
Nahibaluan nga lakip sa mga sintomas sang leptospirosis amo ang hilanat, muscle pains, pagpula sang mata, kag pagpalanakit sang ulo.#
(Photos: Iloilo City Health Office/FB)
