Nagpaathag ang Iloilo City Police Station 9 nga wala ini nagapabaya sa isyu sang mga kabataan ilabi na ang involved sa mga kompruntasyon kag ginamo.
Sang tinalikdan nga gab-i, may isa ka insidente sa Jaro Plaza kun sa diin nabun-an sa likod ang 17-anyos nga si alias Leo kag gin-alegar nga ginbululigan pa sumbag sang pareho man niya nga mga menor de edad.
Sa interview sang Bombo Radyo kay Police Major Eduardo Siacon, Jr., hepe sang Police Station 9, ginpahayag sini nga sang amo nga tion, yara sa Cuartero, Jaro ang nagapatrolya nga pulis apang madasig man nga naka-responde.
Pahayag sang hepe, nagahatag sila sang tag-duha ka oras agud nga mabantayan ang plaza, kag nagasaylo naman sang lain nga visibility point, kag nagabalik naman para nga mas masangkad ang ma-cover sang police deployment.
“Ang aton nga patrol ara lang sa Cuartero. Natabuan nga ang visibility point ya didto nga area. Narespondehan man naton gilayon kay lapit lang ang Cuartero, lapit lang ang patrol. Ang problema lang galing kay gina-timing man nila nga wala abi ang pulis. Amo gid na ang gakatabo — timingon lang nga wala ang pulis kag magginamo,” suno kay Siacon.
Nahibaluan nga natugyan na sa Balay Dalayunan sa Bo. Obrero, Lapuz, Iloilo City si alias William nga amo ang nagbuno kag ang kaupod sini nga gin-alegar nagbulig sumbag sa biktima.
Ginapangita naman ang duha ka iban pa nga kaupdanan nanday William nga ginatudlo man nga nakabulig sa pagsumbag.
Una na nga ginpahayag nga nag-ugat ang kinagamo sang ginkumpronta ni alias Leo ang grupo ni alias William kun sila ang nagsumbag sang iya nga abyan. Sang nagbaisay na, didto kag ginbuno ini sa likod kag ginsumbag. Estable na subong ang kondisyon sang biktima sa ospital.
IBAN PA NGA MGA TIKANG
Magluwas sa pagpatrolya, ginmensyonar man ni Police Major Siacon ang iban pa nga ginahimo sang kapulisan para sa ikaayo sang kabataan.
Suno sa iya, nagapakig-angot sila sa mga eskwelahan agud mahibal-an ang mga bata nga naga-grupo-grupo. Ginakilala man sini ang mas mabaskog nga koordinasyon sa barangay kag sa mga opisyal sini nga amo gani ang rason kun ngaa madasig nga na-turn over sa Balay Dalayunan sanday alias William.
Padayon man ang implementasyon sang curfew for minors, magluwas lang kun may upod sila nga mga guardian ukon mga ginikanan. Kun wala suno sa hepe, ginapapuli gid ang mga kabataan agud nga indi na ma-involve sa mga kinagamo.#
