Nag-apelar ang Philippine Constitution Association (PHILCONSA) sa Supreme Court nga balikan kag ikonsiderar liwat ang desisyon sini sa impeachment case batok kay Vice President Sara Duterte.
Nagpabutyag man sila sang kabalaka nga ang nasambit nga ruling ang posible magbutang sa risgo sang balanse sang gahom nga ginaprotektahan sang 1987 Constitution.
Sa apat ka panid nga pahayag nga pirmado ni former Chief Justice Reynato S. Puno bilang chairman sang PHILCONSA, ginpahayag sang grupo nga ang desisyon sang Supreme Court ang dapat usisaon liwat bangud sa posibilidad nga ini ang naglapas sa prinsipyo sang separation of powers kag sa exclusive authority sang House of Representatives sa pagdumala sang impeachment proceedings.
Gindugang pa sang grupo nga nagdesisyon ang Korte Suprema nga wala sang matuod-tuod nga factual basis halin sa trial court ukon sa Court of Appeals, kag nagsalig lamang sa “makaduluda” kag “wala na-verify” nga mga report.
Ginpanawagan sang grupo sa Supreme Court nga usisaon liwat ang mga “salient facts” nga ginbasehan sang desisyon, agud masiguro ang kamatuoran nga amo gid ang nagapakita sang realidad, kag ang ruling mangin malig-on.
Nagalaum man ang PHILCONSA nga irekonsiderar sang Korte ang ginpatuman nga pito ka bag-o nga rules nga naga-apekto sa proseso sang impeachment sa Kamara.
Suno sa grupo, ang pagpatuman sini sang SC amo ang direkta nga paglapas sa constitutional provision nga nagahatag lamang sa House of Representatives sang gahom sa impeachment.
Matandaan nga sang Hulyo 25, gindeklarar sang Supreme Court nga unconstitutional ang ginpasaka nga articles of impeachment batok kay Vice President Duterte, sa isa ka unanimous nga desisyon.
