Isa si Msgr. Meliton Oso, director sang Jaro Archdiocesan Social Action Center, sa mga nagalaom nga baliskadon sang Supreme Court ang nauna nga ruling sini nga “unconstitutional” ang articles of impeachment batok kay Vice President Sara Duterte.
Pahayag ni Oso matapos gindala man ang isyu sa iya homily sa Jaro Metropolitan Cathedral subong nga aga, Agusto 10: “Kun masanagan sila kag mahatagan sang husto nga information, I think bag-uhon nila ang ila nga desisyon.”
Panawagan sini sa publiko: “Tun-an naton nga mga Pilipino ang isyu [sa impeachment], and speak out. Ipaabot naton sa ila kun ano ang nakita naton nga kamatuoran.”
Matandaan nga nagboto ang Korte Suprema, 13-0-2, kag nagsaad nga ang Articles of Impeachment ang barred sang one-year rule sa idalom sang Article XI Section 3 paragraph 5 sang Constitution. Ginsiling man sang mga mahistrado nga ang articles sang Kamara ang naglapas sa right to due process.
Apang nagalaom si Oso nga masanagan ang mga mahistrado paagi pag-repaso sa ila ruling. Gindala man sini sa panawagan ang mga Senador matapos nga nagboto ang upper chamber, 19-4-1, agud nga i-archive ang articles of impeachment.
“We pray nga masanagan ang justices sang Supreme Court kag ang aton nga Senado, kay tanan kita suluguon sang Diyos. Timbang. Timbang. Klaro nga ang kabubut-on sang Diyos ang dapat masunod. That is why we ask the justices of the Supreme Court: ‘Ginasunod niyo bala ang kabubut-on sang inyo Master nga amo ang Ginuong Hesukristo?’ Ang mga senador, ginapamangkot man naton, ‘Ginasunod niyo bala ang kabubut-on sang inyo Master nga amo si Kristo, ukon ang inyo nga ambisyon ang inyo ginaprotektahan inyo?’,” dugang ni Oso.
Tatlo ka motions for reconsideration ang napasaka na sa Korte Suprema agud nga hingyuon ang justices nga baliskadon ang ila nauna nga desisyon.#
