Nakitaan sang posibilidad sang Philippine Coast Guard (PCG) nga gamiton sang China ang bag-o lang nga insidente sang bunggoanay sa Bajo de Masinloc bilang ebidensya nga may ginapanag-iyahan sila nga “sovereign rights” sa teritoryo nga sakop sang katubigan sang West Philippine Sea.
Suno kay Commodore Jay Tarriela, spokesperson sang PCG para sa West Philippine Sea, abilidad na sang China ang paghimo sang ila kaugalingon nga bersyon sang istorya kag pagbali sang kamatuoran agud maprotektahan ang ila interes.
Ginapaabot man niya nga sa palaabuton nga mga adlaw, magpagwa na ang China sang opisyal nga pahayag angot sa natabo.
Dugang pa ni Tarriela, base sa mga nagligad nga pamahayag sang China, indi man makatilingala nga pasipalahon nila ang iban nga pungsod kag indi iako ang ila kaugalingon nga sala.
Apang ginsiling ni Tarriela nga ang pinakaepektibo nga depensa sang Pilipinas amo ang pagbukas sang kamatuoran sa publiko paagi sa mga video kag litrato nga nagapakita sang matuod-tuod nga natabo.
Ini nga mga ebidensya amo ang ila ginapangunahan nga armas batok sa propaganda nga impormasyon halin sa China.
Sa pihak sang tensyon, nagpabilin gihapon sa Bajo de Masinloc ang mga barko sang PCG agud magpadayon sa pagbulig sa mga lokal nga manugpangisda.
Nagahatag sila sang fuel subsidy agud mapadayon ang operasyon sang mga manugpangisda sa lugar.
