Ginpahayag ni Senador JV Ejercito nga ipa-subpoena niya ang mga district engineer sang Department of Public Works and Highways (DPWH) nga ginatudlo nga may kahilabtanan sa mga maanomalya kag “ghost” flood control projects, labi na gid kun padayon nga isnabon sang mga ini ang ginapatigayon nga imbestigasyon sang Senado.
Suno kay Ejercito, iya hingyuon si Senate Blue Ribbon Committee Chairman Senador Rodante Marcoleta nga ipatawag ang mga district engineer sa masunod nga committee hearing, particular na ang halin sa DPWH-Bulacan District Office nga kilala sa madugay na nga isyu sang korapsyon.
Sa pihak nga bahin, ginhatagan ni Senador Raffy Tulfo sang authority si Sen. Marcoleta nga siya ang magpatawag kay DPWH-Batangas 1st Engineering District Engineer Abelardo Calalo, nga gina-akusar nga nagtuyo nga magsuhol kay Batangas Rep. Leandro Leviste sang P360 million agud indi na padayunon ang imbestigasyon sa flood control projects.
Nagapati si Tulfo nga may yara sang malapad nga sindikato sang iregularidad sa mga proyekto sang flood control.
Ginklaro man niya nga indi tanan nga district engineer ang apektado, apang posible nga may madamo sa ila ang naga-serbi bilang “bagmen” sang mga kontraktor.
Samtang, ginpabaskog man ni Senador Ping Lacson ang posibilidad nga ang mga district engineer amo ang nagaserbi bilang “Bagman” ukon “Legman” sang mga daku nga kontraktor.
Ini ang iya ginpunto matapos nabuyagyag ang alegasyon sang suhol kay Leviste.
Ginpunto sang mga senador nga kinahanglan sang mas madalom nga imbestigasyon agud matukiban kun sin-o gid ang yara sa likod sang korapsyon sa gobyerno.
