Nagtukod ang Department of Trade and Industry sang fact-finding team agud mag- oversee sa imbestigasyon sa Philippine Contractors Accreditation Board (PCAB).
Suno kay DTI Secretary Cristina Roque, ang probe ang kasunod sang madamo nga alegasyon sang conflicts of interest, accreditation irregularities, kag potential nga mga pag-abuso sa poder nga nagbutang sa integridad sang operasyon sang Board agud mangin kwestiyonable.
Suno kay Roque, padalman sang DTI ang review sa pagginawi sang current board members kag officials sang PCAB kag irekomendar kay Presidente Marcos ang mga tikang, kalakip na ang possible pagsipa sa ila sa posisyon.
Una na ginsiling sang bag-o gindesignar nga tiglikom sang Department of Public Works and Highways nga si Vince Dizon nga may revamp sa sulod sang PCAB sa tunga sang imbestigasyon sa mga flood control projects sa pungsod.
Suno sa DTI, ang inquiry magabug-os sang mas masangkad nga mandato sini agud protektahan ang mga stakeholders kag consumers sa construction industry kag iduso ang pinakamataas nga standard sang governance sa public service.
Una diri, gintuad ni Senator Panfilo “Ping” Lacson ang ginaalegar nga extortion sa Philippine Contractors Accreditation Board (PCAB) sa diin isa ka contractor ang ginpahog nga magbayad sang indi magnubo sa P1 million ukon mangatubang ini sang non-renewal sang lisensya.
