Masobra 100,000 ka tawo ang nagtambong sa dako nga hublag-protesta sa Luneta Park kag EDSA People Power Monument sang Setyembre 21 agud ipabutyag ang ila kaakig sa nagapadayon nga imbestigasyon sa korapsyon nga nagalakip sang bilyones nga pondo para sa flood control projects.
Suno sa report ginabulubanta 50,000 ka tawo ang nagtambong sa “Baha sa Luneta, Aksyon sa Korapsyon” nga gin-organisar sang mga progresibo nga grupo, base sa data sang Manila Disaster Risk Reduction and Management Office.
Sa EDSA kag White Plains Avenue naman, masobra sa 70,000 ang mga raliyista nga nagpadulong sa lugar.
Nagpatigayon man sang rally kontra korapsyon sa Cebu City, Bacolod, kag Iloilo nga ginpangunahan sang pila ka mga katapo sang simbahang katolika.
Suno kay Defense Secretary Gilberto Teodoro, malinong ang mga protesta, magluwas lang sa Mendiola kun sa diin may mga nagkasamaran kag gin-aresto matapos magluntad ang kinagamo sa diin nagpanghaboy ang mga ini sang bato kag ginsunog ang mga goma sang truck.
Gin-report sang National Capital Region Police Office nga 39 ka pulis ang nasamaran kag 17 ang gin-aresto.
Ginpahayag man nga mga menor de edad ang pila sa mga nagpanguna sang gamo.
Sa tunga sang protesta nasiplatan nga nagtambong sanday ML Rep. Leila De Lima, Gabriela Rep. Sarah Elago, kag Kabataan Rep. Renee Co.
Sa EDSA, present man sanday Senators Risa Hontiveros, Bam Aquino, kag Kiko Pangilinan; upod man si former Finance Undersecretary Cielo Magno kag former Quezon City Rep. Kit Belmonte.
Ang “Trillion-Peso March” nagsugod sa EDSA Shrine sang aga, kag nagpadayon tubtob sa People Power Monument.
Samtang sa pihak nga bahin, nagapati ang Palasyo nga posible may nagamandu sa mga indibidwal nga nagapang-harass sa ginapatigayon nga hublag-protesta.
Suno kay Palace Press Officer Atty. Claire Castro, apisar naka-maximum tolerance ang mga pulis, dapat nga dakpon nila ang mga nagatuga sang gamo.
