Ginpabutyag sang mga residente sang Barangay Katilingban, Molo, Iloilo City nga mas maayo kuntani nga ginpunduhan sang syudad ang proyekto para sa drainage system kag indi ang ‘overpriced’ nga waiting shed.
Sa interview sang Bombo Radyo kay Armando Villaram, ginpahayag niya nga wala sila sang mahimo kundi maglusong sa baha kada ulan.
Dugan pa ni Villaram nga lab-ot sa tuhod ang tubig baha kag nagapabilin ini sa alagyan bangud wala sang maayo nga drainage.
Ginpabutyag man niya nga may mga residente na nga ginmasakit bangud sa ‘stagnant water.’
Ginkwestyon sang mga pumuluyo ang kapin ₱800,000 nga balor sang waiting shed nga ginpatindog sa ila barangay.
Matandaan nga madamo ang nagkwestyon sa proyekto sang waiting shed sa Barangay Katilingban bangud sa presyo nga nagalab-ot sa kapin ₱800,000.
Sandig sa project billboard, ang Iloilo City Engineering Office ang nagpatigayon sang proyekto.
Ang Abelarde Builders and Supply ang ginpili nga kontraktor sang proyekto.
Wala ginbutang sa billboard kun san-o ini gin-umpisahan kag kun san-o matapos.
Apang nakabutang nga 25 ka adlaw ang contract duration sang proyekto.
Ginapanawagan sang mga pumuluyo nga unahon ang mga proyekto nga makabulig sa pagpugong sang baha./JDS
(Reported by Bombo Jomar Villa/Bombohanay Bigtime)
