Pareho nga istorya sang “redirection” ang ginpakigbahin sang duha ka mga Ilonggo nga nangin topnotchers sa October 2025 Foresters Licensure Examination.
Ini amo sanday Jade Micah Lebuna Bangeles, residente sang Barangay Pasig, Lambunao, Iloilo, Rank 5, nga may rating nga 93.50%; kag Bobby Jamili Maderse, residente sang Yabon, Janiuay, Iloilo, Rank 6, nga may rating 93.35%.
Pareho sila nga mga produkto sang West Visayas State University-College of Agriculture and Forestry (WVSU-CAF).
Sa interview sa Good Morning Philippines program, ginpahayag nanday Bangeles kag Maderse nga pareho nila nga indi first choice ang Forestry kag pareho man sila nga naghandum anay nga makasulod kuntani sa engineering program.
Sa bahin ni Bangeles nga ika-lima sa walo ka mag-utod, ginpakigbahin sini nga indi masarangan sang iya ginikanan ang tuition fee, magluwas pa nga diri gid ini sa syudad kinahanglan mag-eskwela kun lagson sini ang engineering.
Ini ang rason suno sa iya nga ginpili sini nga mangin practical kag gintun-an ang Forestry.
“Naisip ko man nga nami man [ang Forestry], kag gusto ko man nga mag-dig deeper kun ano ja. Indi man sa napiritan ako kag ginbuol ko jang course nga ja. Waay man ko nag-expect nga mapalangga ko ang course ko as time goes by,” pahayag sini.
Antes naman nag-eskwela sa WVSU-CAF, duha ka beses nga napaslawan si Maderse nga makasulod sa engineering.
Sa una nga tuig, wala ini nakapasar bangud sa lain nga strand sa Senior High School; kag sa ikaduha nga tion pagkasunod nga tuig, wala gihapon ini makasulod sa amo nga program.
Apang kun may bilin man si Maderse sa pareho sini nga kabataan, indi gid dapat madulaan sang paglaum sa tion sang kapaslawan.
“May mga bagay nga indi naton makuha — like ang imo nga dream course. Indi man abi tanan naton nga plano, nagakasunod. Maayo lang kay gina-redirect kita sang God nga may mayad nga opportunity nga matabo kanimo sa imo kabuhi. Grateful kami sa amon nga journey,” suno sa iya.
Ginpakigbahin man sini kun ano kadaku ang bulig sang Forestry sa komunidad.
“Basi isipon da nga forestry man lang da, tanum-tanum lang, wala man may gina-obra. Indi ninyo pag-i-underestimate ang forestry, kay bangud sini, may environmental conservation kita. Indi niyo pag-ikahuya ang course niyo nga forestry, kay daku ang bulig sini sa aton nga environment kag sa aton nga economy,” dugang sini.
Nagdugang naman si Bangeles nga indi kinahanglan nga i-pressure gid ang kaugalingon.
“Kung una, indi mo gusto ang gin-take mo nga course, i-try mo gid ang best mo nga palanggaon kung ano ang may diyan ka subong. Kay hambal da gani, gina-redirect kita sang Ginuo sa something nga better… Indi pag-i-pressure ang kaugalingon; spend time nga makapahuway man para nga indi matam-an,” pahayag sini.
Nahibaluan nga sa sini nga pasinawan nga gin-administer sang Professional Regulation Commission (PRC), nagpangaduha ang WVSU-CAF sa Top Performing Schools (with 50 or more examineees) kun sa diin 49 sa 56 ka mga estudyante sini ang nakapasar.
Para kay Dr. Joel Araquil, campus administrator, produkto ini sang mapag-on nga kolaborasyon sang eskwelahan, mga estudyante, kag mga manunudlo.
“We are very happy. It’s because of the collaborative efforts of everybody, especially our University President, Dr. Joselito Villaruz, the heads of the College, the faculty who really give their best nga mabuligan ang mga estudyante from the time nga na-enrol sila, up to maka-graduate sila, up to the time nga naga-review sila,” pahayag sang campus administrator.#
