Nagpanindugan si President Ferdinand Marcos Jr. nga indi dapat pagdali-dalion ang pagpasaka sang kaso batok sa mga indibidwal nga may kaangtanan sa flood control corruption.
Pahayag sang presidente, dapat sa gihapon nga sundon ang due process.
Sabat ini ni Marcos sa tunga sang mga kritisismo nga iya nabaton halin sa business and labor groups bangud sa mahinay nga hulag sang iya administrasyon sa flood control scandal.
Suno sa punong ehekutibo, masami siya makabaton sang mga mensahe nga dapat ipadakop na ang mga tawo nga kurap. Apang pahayag sini, dapat nga mapag-on ang mga ebidensya sa mga kaso agud masiguro nga ma-convict gid ang mga involved.
“‘Alam naman natin kung sino sila, ikulong mo na.’ ‘Kunin mo lahat ang pera nila.’ ‘Ipagbenta mo na ‘yung mga bahay nila, ibalik sa ano… What would then I be accused of if we did that?,” suno kay Marcos samtang didto sa Malaysia para sa 47th ASEAN Summit and Related Summits.
Kun mahuyang ang kaso suno kay Marcos, pat-od nga mahilway man gihapon ang mga tawo nga nangawat sang binilyon ka pesos gikan sa kaban sang gobyerno.
“That would be much worse result. So, due process must be observed,” suno sa chief executive.
“We must make sure na alam – alam naman talaga natin kung sino sila. Kaya tiyakin natin na makukulong talaga sila at ang kanilang mga ninakaw ay ibalik sa gobyerno, ibalik sa tao,” pahayag sini. “So, do you want to get it done quickly or do you want to get it done right? That’s the choice that we have.”
