Nakabalik na si President Ferdinand Marcos Jr. sa Pilipinas kaina sang kaagahon matapos nagtambong sa 47th Association of Southeast Asian Nations Summit sa Kuala Lumpur, Malaysia.
Sa arrival statement sang presidente, ginsiling sini nga ang ASEAN Summit isa ka oportunidad para sa 11 ka member states kag sa ila mga partner nga madiskusyunan ang importante nga mga isyu sa tunga sang mga pagpanghangkat sa geopolitics kag sa ekonomiya.
Lakip sa nadiskusyunan suno sa iya amo ang West Philippine Sea.
“We discussed significant international issues that emerging challenges that not only impact our peoples and our nation, but also the entire region, especially the West Philippine Sea,” suno sa punong ehekutibo.
Pahayag sini, magapabilin ang Pilipinas nga mabakod kag kalmado sa pagdepensa sa soberanya kag kinamatarong kag hurisdiksyon sa amo nga teritoryo. Ini tanan suno sa iya ang nagasanto sa kun ano ang nakabutang sa international law.
Gindugang sini nga magapadayon ang pungsod sa pagpabakod pa sa partnership sa mga pungsod nga kaangay sa Pilipinas nagahatag sang balor sa kalinong kag progreso sa ekonomiya.
“The leaders and I spoke about future-proofing our region through economic cooperation and sustainable growth,” pahayag sini. Nagpahayag ang ASEAN leaders suno sa iya sang ila nga collective commitment sa “rules-based, open, inclusive, transparent, and non-discriminatory multilateral system.”
Nahibaluan nga antes nagtakop ang Summit and Related Summits, gin-turnover sang Malaysia sa Pilipinas ang hosting duties bilang chair sang ASEAN sa 2026.#
