Patay ang 23 ka mga tawo kag 11 ang nasamaran matapos masunog ang isa ka convenience store sa Sonora, Mexico, kadungan sang selebrasyon sang Tigkalalag sa pungsod.
Suno kay Carlos Freaner, presidente sang Mexican Red Cross, lakip sa mga biktima ang 12 ka mga babayi, 5 ka lalaki, kag 6 ka mga kabataan.
Ginpahayag nga ang nagapanguna nga rason sang ila kamatayon amo ang paghaklo sang aso.
Ginklaro naman sang lokal nga gobyerno sang Sonora nga ang insidente indi tuyo kag wala sing kahilabtanan sa terrorist attack, base sa mga nauna nga espekulasyon.
Padayon subong ang imbestigasyon sa matuod nga kabangdanan sang sunog.
Samtang, sa isa ka social media post, nagpalab-ot sang pagpakig-unong si Mexican President Claudia Sheinbaum Pardo kag ginpasiguro ang gilayon nga bulig sang gobyerno sa mga pamilya sang mga napatay.
