Nagdangat sa masobra 400 ka mga balay ang na-report nga naguba sa probinsya sang Iloilo kasunod sang mabaskog nga hangin dala ni Bagyo Tino.
Sa latest nga situationer report sang Provincial Disaster Risk Reduction and Management Office (PDRRMO), 418 ka mga balay ang partially damaged samtang 24 ang totally damaged bangud ginpangpalid sang hangin kag nagkalatumbahan sang kahoy.
Lakip sa mga banwa nga may na-record nga nagkalaguba nga mga balay ang Pavia, Pototan, Leganes, San Enrique, Lemery, Maasin, Batad, New Lucena, Cabatuan, kag Janiuay.
Nagsaka naman sa masobra sa 120,420 ka mga indibidwal ang apektado sa probinsya nga naghalin sa 37,800 ka pamilya sa 40 tanan ka kabanwahanan sa probinsya.
Sa sini nga mga pamilya, masobra sa 15,800 ang nagpatigayon sang preemptive evacuation agud nga masecure ang kaugalingon sa tunga sang paglaslas sang bagyo.
Ang ini nga numero ang ginalantaw nga magasaka pa bangud padayon ang pagsulod sang data nagikan sa nagkalain-lain nga banwa.
25 naman ka mga banwa ang nag-report nga may power interruption kag as of 3:00 kaina sang kaagahon, 12 pa lamang ang fully-restored.
Nahibaluan nga pasado ala una kahapon sang hapon sang nag-landfall ang bagyo sa Iloilo City kun sa diin nabatyagan man ang kakusog sang hangin mangin sa mga kabanwahanan sa probinsya.# (Photo: Sir Jan-Jan)
