Napaidalom sa Wind Signal No. 1 ang Iloilo, Aklan, Capiz, Guimaras, kag Antique ukon ang bilog nga Western Visayas bangud sa bagyo Verbena.
Sandig sa 5:00 am nga weather bulletin sang Philippine Atmospheric, Geophysical and Astronomical Services Administration (PAGASA), ulihi nga nakit-an ang bagyo sa kalayuon nga 330 km nasidlangan sang Surigao City, Surigao del Norte.
Dala sini ang kabaskugon sang hangin nga 45 km/h malapit sa sentro kag pagmadlos nga tubtub sa 55 km/h. Nagahulag ini pa-nakatundan sa kadasigon nga 30 km/h.
Magluwas sa Western Visayas, madamo nga areas sa Luzon, Visayas, kag Mindanao ang napaidalom subong sa Wind Signal No. 1 kun sa diin posible ang minimal to minor impacts bangud sa mabaskog nga hangin.
Base sa track forecast, magahulag si Verbena pa-nakatundan naaminhan nakatundan kag maga-landfall ukon magalabay malapit sa northeastern Mindanao karon sa udto ukon karon sa hapon.
Pagkatapos, magatabok ini sa Visayas kag sa northern portion sang Palawan halin subong nga adlaw tubtub sa Myerkules kag magatuhaw sa Myerkules sang aga.
Suno sa weather bureau, mahimo magbaskog ang bagyo antes ini mag-landfall sa northeastern Mindanao apang possible man nga magapabilin ini sa kategorya nga Tropical Depression samtang yara ini sa Philippine landmass.
Kun magtuhaw na ini sa West Philippine Sea, magabaskog pa ini kag mahimo nga tropical storm.
CLASS SUSPENSION
Gin-anunsyo naman sang Iloilo City Government ang automatic class suspension halin sa pre-school tubtub sa kindergarten bangud napaidalom ang syudad sang Iloilo sa signal no. 1.
Yari ang announcement:
“As Iloilo City is under TCWS signal no. 1 – automatic class suspension from pre-school to kindergarten, public and private (DepEd Memo Order 22 s. 2024.”
Ini nga memorandum amo ang nagaplastar sang revised guidelines sa class and work suspension sa mga eskwelahan sa tion sang disasters kag emergencies agud mapabilin ang kaluwasan sang mga kabataan kag personnel.#
