Kinumpirma ng Department of Foreign Affairs (DFA) na ligtas ang 63 Pilipino matapos ang mapaminsalang sunog na tumama sa Wang Fuk Court apartment complex sa Tai Po district, Hong Kong. Gayunman, iniulat ng ahensya na isang Pilipino ang nasugatan habang isa pa ang nananatiling nawawala.
Sa inilabas na pahayag, sinabi ng Philippine Consulate General sa Hong Kong na nagpapatuloy ang kanilang operasyon sa lugar upang matunton at matulungan ang lahat ng Pilipinong naapektuhan ng insidente. Ayon sa kanilang mobile teams, walang banta sa buhay ang mga survivor na Pilipino at wala ring iba pang iniulat na nagtamo ng injury maliban sa isang nasugatan na kasalukuyang sumasailalim sa medical assistance.
Samantala, patuloy na hinahanap ang isang nawawalang Pilipino na hanggang ngayo’y hindi pa rin makontak.
Ayon kay DFA spokesperson Angelica Escalona, may mga Pilipinong nakarehistro bilang residente at manggagawa sa Wang Fuk Court subalit hindi pa malinaw kung sila ay nasa gusali nang sumiklab ang sunog, dahil wala ring ulat mula sa kanilang mga employer na nawawala ang mga ito. Patuloy umano nilang inaalam ang aktwal na lokasyon at kalagayan ng mga ito.
Sinabi pa ng DFA na kasalukuyang biniberipika ng Consulate General ang estado ng 91 Pilipino na nakarehistro sa nasabing apartment complex. Posible umanong ang ilan sa kanila ay nagpalit na ng employer, lumipat ng tirahan, o umuwi na sa Pilipinas bago mangyari ang insidente.
Samantala, umakyat na sa 128 ang kumpirmadong nasawi sa malagim na sunog, habang daan-daang katao pa rin ang patuloy na pinaghahanap.
