Nagdeklarar na ang gobyerno sang Sri Lanka sang state of emergency matapos ang lapnagon nga mga pagbaha kag mudslide tuga sang Cyclone Ditwah nga nagpatay na sang masobra 330 ka tawo.
Ini ang ginakabig nga isa sa pinaka-delikado nga bagyo nga naglaslas sa mga nagliligad nga tuig sa amo nga pungsod.
Masobra 200 ka mga tawo ang padayon nga missing samtang 200,000 ka mga kabalayan ang nagkalagguba nga na nagpa-displace sa 108,000 ka mga indibidwal padulong sa state-run temporary shelters.
Suno sa mga opisyal, yara sa one-third sang pungsod ang wala sang suplay sang kuryente kag tubig.
Ginpahayag naman ni Sri Lankan President Anura Kumara Dissanayake nga ini n ang pinaka-challenging nga kalamidad nga nag-igo sa maragtason sang ila pungsod kag lala ang halit nga ginbilin sini.
Nagpatigayon naman sang mga evacuation sa pila ka mga lugar kadungan sang madasig nga pag-lapaw sang tubig halin sa Kelani River.
base sa isa ka residente halin sa central Sri Lanka, yara sa 15 ka mga kabalayan sa ila lugar ang nalubong sa idaloom sang dalagkuan nga mga bato kag lutak kag wala sa mga residente ang nakaluwas.
Pinakadako nga numero sang mga napatay ang na-report sa Kandy kag Badulla, kun sa diin madamo sang mga lugar ang wala pa makadtuan.
Kaangot diri, nag-apelar na ang Sri Lankan government para sa international aid kag gin-engganyo ang mga Sri Lankans nga yara sa abroad nga mag-donate sang kwarta para suportahan ang mga apektado nga komunidad.
