Hugot nga ginpanginwala ni anay senador Ramon “Bong” Revilla Jr. nga may kahilabtanan ini sa gina-alegar nga “ghost” ukon indi matuod nga flood control projects sa probinsya sang Bulacan,
Ini matapos nga nalakip ang iya pangalan bilang isa sa mga respondent sa duha ka reklamo nga ginpasaka sa Department of Justice (DOJ).
Suno sa DOJ, sanday Revilla kag former Ako Bicol party-list representative Zaldy Co ang natumod nga “proponents” sang amo nga proyekto.
Nahibaluan nga si Revilla ang gindugang sa isa sa mga reklamo nga ginpasaka sang SYMS Construction, nga amo ang contractor nga gin-alegar nga nakabenepisyo sa ghost projects sa nasambit nga lugar.
Matandaan nga nagrekomendar ang Independent Commission for Infrastructure (ICI) sa Office of the Ombudsman nga pasakaan sang kaso sanday Revilla kag iban pa, base sa testimoniya ni former Public Works and Highways Undersecretary Roberto Bernardo.
Si Bernardo ang una nga nagbuyagyag nga nakabaton si Revilla sang 25% nga balor sang commission gikan sa flood control projects.
Kasunod sang rekomendasyon sang ICI, nagpagwa sang pahayag ang spokesperson ni Revilla nga wala sang nabaton nga imbitasyon ang anay senador gikan sa fact-finding body kag wala siya nakahatag sang iya sabat ukon depensa sa isyu.
