Nagpasaka ang civil society members kag church personalities sang kaso nga plunder batok kay Vice President Sara Duterte sa Office of the Ombudsman subong nga adlaw, Disyembre 12, bangud sang ginaalegar nga ma-anomaliya nga paggamit sang confidential funds.
Lakip man sa ginpasaka nga panumbungon pati na sa mga personnel sang Office of the Vice President (OVP) kag Department of Education (DepEd) kun sa diin tiglikom anay ang bise-presidente amo ang masunod:
- Paglapas sa section 3(a) kag (e) of Republic Act No. 3019 ukon Anti-Graft and Corrupt Practices Act
- Malversation sa idalom sang Article 217 sang Revised Penal Code
- Bribery kag/ukon corruption sang public officials sa idalom sang Articles 210 kag 212 sang Revised Penal Code
- Betrayal sang public trust sa idalom sang Article XI, Section 2 sang 1987 Constitution
- Culpable violation sang 1987 Constitution
Lakip sa mga nagpasaka sang reklamo amo ang activists-priests nga sanday Flavie Villanueva kag Roberto Reyes, anay Finance Undersecretary Cielo Magno, former peace adviser Teresita Deles, kag iban pa.
Kun balikan, nabalahuba sa legislative inquiry nga ang contingent funds sang 2022 national budget ang ginsaylo para sa P125-million confidential funds sang OVP. Ini nga kantidad ang gingasto sang opisina ni Duterte sa sulod lamang sang 11 ka adlaw.
Sang Hunyo naman, gin-adoptar sang Kamara ang report sang Committee on Good Government nga naga-rekomendar sang pagpasaka sang criminal, civil, and administrative complaints batok sa Vice President.
Natukiban sang panel nga ang P612.5 million confidential funds ang gin-disburse sa idalom sang liderato ni Duterte sa OVP kag DepEd.
Matandaan nga ang isyu sa confidential funds ang isa man sa nangin basehan sang gin-file sang Kamara ang impeachment complaint batok sa Vice President bangud sang ginapahayag pag-traidor sang bise presidente sa public trust kag pag-komiter sang graft and corruption sa iya nga misuse kag malversation sang iya nga confidential funds.
