Ginkumpirmar ni Interior and Local Government Secretary Jonvic Remulla nga bankay ni anay Department of Public Works and Highways (DPWH) Undersecretary Catalina Cabral ang nasapwan sa Tuba, Benguet.
Suno kay Remulla, nagsanto ang resulta sang DNA kag fingerprint examination ni Cabral.
Samtang, ginsiling man sang tiglikom nga base sa ginpatigayon nga autopsy, wala sang nakita nga palantandaan sang foul play sa pagkapatay sang anay opisyal.
Ginlaragway man ni Remulla ang malala nga pilas nga naagom ni sini.
Suno sa iya, wasak ang natuo nga bahin sang itsura kag likod sang ulo sang biktima.
Nabalian naman sang pareho nga kamot kag nabuho ang pila ka mga internal organs bangud sa pagkabali sa tyan nga bahin.
Dugang pa ni Remulla , ginabulubanta 30 metros ang ginhulugan ni Cabral halin sa kilid sang Kennon Road, katumbas sang pagkahulog halin sa isa ka napulo ka panalgan sang building.
Sa subong, nagapadayon nga person of interest ang driver ni Cabral nga si Ricardo Hernandez.
Base sa imbestigasyon, una nga nag-agi si Cabral sa lugar takna ‘las-8 sa aga sa diin nagpanaog ini sa salakyan kag nagpungko sa bato.
Dugang pa diri, nagsaka pa si Cabral sa isa ka hotel kag nagtinir nga nagaisahanon.
Makaligad ang isa ka oras, nagbalik ini sa pareho nga lugar sa diin nasapwan ang bangkay sini.
(PAMILYA)
Padayon ang koordinasyon sang mga awtoridad sa pamilya ni Cabral agud makuha ang iya cellphone, nga suno sa bana,a igahatag ini matapos ang cremation.
Nakatalana man nga dagdagan sang search warrant ang isa ka hotel nga ulihi nga gintiniran sang anay opisyal.
Samtang, ginkakas naman sa pwesto ang hepe sang pulisya sang Tuba, Benguet bangud sa mga lapses sa imbestigasyon.
Nagapanawagan man ang National Bureau of Investigation (NBI) sa mga motorista nga nagaagi sa Kennon Road nga magsumiter sang dashcam footage na possible makabulig sa kaso.
Hugot naman nga ginpanginwala sang pamilya ni Cabral ang akusasyon nga peke ang ginapahayag nga pagkapatay sang anay opisyal.
Matandaan nga antes napatay si Cabral, isa ini sa naulamid sa kontroberisya may kaangtanan sa ginapahayag nga anomalya sa flood control projects sa Bulacan.
Suno sa Department of Justice, nakatalana kuntani nga i-refer sa Office of the Ombudsman ang isa ka kaso nga plunder batok kay Cabral.
