Tatlo ka tawo ang napatay kag isa ang pilason sa shooting incident nga nagluntad sa New South Wales, Australia.
Sandig sa kapulisan, nakapalagyo ang suspek kag padayon pa subong nga ginapangita sang awtoridad.
Base sa inisyal nga impormasyon, una nga gintiro-patay sang suspek ang babaye kag lalaki sa salakyan sa residential area sa Lake Cargelligo.
Sunod nga gintiro-patay man ang isa pa gid ka babaye. Gintiro man sini ang isa pa ka lalaki nga subong kritikal ang kondisyon sa ospital.
Ginasuspetsahan nga isa ini ka domestic violence attack.
Ang Lake Cargelligo nahamtang sa sentro sang New South Wales kag may populasyon nga halos 1,500 lamang ka mga tawo.
Natabo ang insidente isa ka bulan matapos ang makakulugmat nga mass shooting sa Bondi Beach sa Sydney nga ginkamatay sang 15 ka mga tawo.
