Ginbasura ni President Ferdinand Marcos Jr. ang mga proposal nga ideklarar ang Chinese Embassy officials sa Pilipinas bilang mga persona non grata.
Suno ini kay Presidential Communications Office (PCO) Undersecretary Atty. Claire Castro subong nga hapon, Enero 30.
“No, ang sagot ng Pangulo,” pahayag sini sa ambush interview. “Basta ang sagot ng Pangulo patungkol sa panawagan na ideklarang persona non grata ang isang ambassador, no.”
Wala na ini sang ginpatpat nga mga detalye ukon rason.
Matandaan nga sa Senado, nagmandu si Senate President Vicente Sotto III sa Committee on Rules nga tun-an ang posibilidad sa pagdeklarar sa pila ka embassy officials sang China bilang persona non grata. Ini kasunod sang pagpang-insulto sang amo nga mga opisyal sang China batok sa mga opisyal sa Pilipinas.
Partikular nga namunuhan amo ang social media post ni Guo Wei, ang Deputy Spokesperson sang Chinese Embassy. Gin-insulto ni Guo ang 15 mga senador nga nagpirma sang resolusyon nga nagapabakod sang kinamatarong sang Pilipinas nga depensahan ang national sini nga interes sa West Philippine Sea.
Sandig naman anay kay Senate President Pro Tempore Panfilo Lacson, ang presidente lamang ang may gahum nga magpalayas sa isa ka diplomat, apang mahimo naman makapaguwa ang Senado sang formal recommendation nga may yara sang daku nga bug-at.#
