Marcos, opisyal na nga naangkon ang isa ka tuig nga proteksyon sa impeachment

Opisyal na nga nakakuha si President Ferdinand “Bongbong” Marcos, Jr. sang isa ka tuig nga immunity sa impeachment proceedings.

Ini ang kasunod sang pag-apruba sang plenaryo sang Kamara sa report sang justice committee nga nagabasura sang duha ka impeachment complaints nga gin-file batok sa presidente.

284 ka mga mamalidha ang nagboto-pabor sa findings sang panel, walo ang nagbalabag, samtang apat naman ang nag-abstain.

Kun basehan ang Konstitusyon, ang sin-o man nga impeachable official kaangay sang Presidente ang mahimo lamang mapaidalom sa isa ka impeachment proceeding sa kada tuig.

Buot silingon sini, kun may luyag man nga mag-file sang impeachment complaint batok kay Marcos, kinahanglan anay nga maghulat sa Enero 2027.

Matandaan nga antes sang pag-apruba sa plenaryo, sang nagligad nga semana, gindeklarar sang justice committee nga “insufficient in substance” ang impeachment complaints batok kay Marcos.

Matandaan nga ang nag-file sang una nga complaint amo si Atty. Andre R. De Jesus kag gin-endorso ni Pusong Pinoy Partylist Rep. Jernie Jett Nisay. Ang ikaduha naman nga complaint ang ginduso ni Liza Maza, Teodoro A. Casiño, Renato Reyes Jr., Atty. Neri Colmenares, kag iban pa, kag gin-endorse naman nanday ACT Teachers Partylist Rep. Antonio Tinio, Gabriela Women’s Partylist Rep. Sarah Jane Elago, kag Kabataan Partylist Rep. Renee Louise Co.

Matapos ang dismissal sang duha ka complaints batok kay Marcos, nagahanda naman subong ang House justice committee sa hearing sang impeachment petitions nga ginpasaka batok kay Vice President Sara Duterte.#