Patay ang siyam ka indibidwal matapos ang maduguon nga mass shooting sa isa ka eskwelahan sa British Columbia sa Canada nga natabo sang Pebrero 10.
Ginkumpirmar sang Royal Canadian Mounted Police nga siyam ang napatay sa pagpangluthang, samtang ang suspek nga gunman nasapwan man nga patay na kag ginapatihan nga “self-inflicted” ang iya naangkon nga pilas.
Anom ka bangkay sang mga biktima ang nakit-an sa sulod sang Tumbler Ridge Secondary School samtang duha naman ang narecover malapit sa isa ka residential property, kag isa ang napatay samtang ginadala sa ospital.
Kasunod sang krimen, ginpasirado ang Tumbler Ridge Secondary School kag Tumbler Ridge Elementary School sa sulod sang isa ka semana.
Nagpalab-ot naman sang pagpaki-unong ang British of Columbia sa mga pamilya sang biktima kag ginpasigurado ang bulig kag suporta sa mga apektado nga mga komunidad.
