Handa nga mag-deploy sang mga personnel ang Iloilo City Traffic and Transportation Management Office (ICTTMO) pananglitan istriktuhan sang Land Transportation Office (LTO) ang implementasyon sang “Anti-Sardinas Policy” sa tanan nga Public Utility Vehicles (PUV).
May kaangtanan ini sa naglapta nga video online kun sa diin makita nga ang isa ka modernized jeepney ang nagapasaka pa gihapon sang mga pasahero apisar nga puno na kag tuman na kagutok ang sulod sini.
Sa interview sang Bombo Radyo kay Ret. PCol. Uldarico Garbanzos, head sang ICTTMO office, iya ginpahayag nga nagahulat na lamang ang ila opisina sang pormal nga direktiba ukon operasyon halin sa LTO agud nga makapartisipar man sila sa implementasyon sang polisiya.
Dugang pa ni Garbanzos nga indi na bag-o sa siyudad sang Iloilo ang isyu sang overloading sa mga modernized jeepney, gani kinahanglan gid ang mas istrikto nga pagpatuman sang kasuguan.
Nagpasalamat man si Garbanzos sa concerned citizen nga nagpakigbahin sang amo nga hitabo sa social media, bangud nakabulig ini agud mahatagan sang nagakaigo nga solusyon sa amo nga problema.
 pananglitan istriktuhan sang Land Transportation Office (LTO) ang implementasyon sang “Anti-Sardinas Policy” sa tanan nga Public Utility Vehicles (PUV).){kind=link}