Wala nakapugong ang mabugnaw nga tyempo agud magtipon sa The Hague, Netherlands ang mga pamilya kag mga nagasuporta sa mga biktima sang drug war ni anay President Rodrigo Duterte sa ginpatigayon nga confirmation of charges hearing kahapon nga adlaw, Pebrero 23.
Sa interview sang Bombo Radyo kay Kara Taggaoa, myembro sang Bayan-Europe, iya ginpahayag nga maiinit ang pagbantay sang pamilya sang biktima apisar nga naglab-ot na sa 10 ka tuig ang ila paghulat sang hustisya.
Suno pa kay Taggaoa, ginatingwaan sang ila grupo nga mangin malinong ang ila pagtililipon kag wala sang tensyon sa tunga sang mga ini kag sa mga taga-suporta ni Duterte.
Dugang pa sini sang naligad lang nga adlaw nagpatigayon man sila sang Bantay Katarungan Week, nga may katuyuan nga magpaabot sang ila nga mga panawagan kag hustisya sa mga mga biktima sang Drug war ni Duterte.
Naga-laom man ang mga ini nga apisar wala nagtambong si Duterte sa hearing kahapon nga adlaw, magatambong na ini sa mga masunod nga hearing agud mabatyagan sang anay Presidente ang mga hibubun-ot kag singgitan sang mga tawo nga nadulan sang palangga sa kabuhi.
Suno pa kay Taggaoa nga kinahanglan ipakigbato sang mga tawo ang ila kinamatarong sa subong tion kag panindugan ini bangud may kinahanglan nga bayaran si Duterte sa iya paglapas sa layi sa idalom sang iya anay administrasyon.
