Bag-o nga Supreme Leader sang Iran, napilasan sa nagapadayon nga gyera —reports

Nagaguwa sa reports sang Iranian state television nga “wounded” ukon “pilason” ang ila bag-o nga Supreme Leader nga si Mojtaba Khamenei.

Ginlaragway siya sa reports bilang “janbaz” ukon napilasan sang mga kasumpong kadungan sa “Ramadan war” nga amo ang ila panawag sa gyera subong sa Iran.

Wala gindetalye kun ano ang ila buot silingon. Ang klaro amo nga napatay ang iloy kag amay sini sa pagsugod sang pag-atake sang Israel kag US sang Pebrero 28.

Wala pa gihapon ginpakita sa publiko si Mojtaba Khamenei halin sang nag-umpisa ang gyera kag bisan pa nga may deklarasyon nga siya ang bag-o nga Supreme Leader.

Isa ka politician kag cleric si Mojtaba Khamenei kag may daku nga impluwensya sa administrators kag sa Islamic Revolutionary Guard Corps, apang indi siya tuman ka bantog sa Iran.

Madamo man ang nagamuno nga kulang ini sa religious credentials nga ginakaptan sang iya amay nga amo anay ang nagpamuno sa clerical regime.

Ang Supreme Leader amo ang “Supreme Leadership Authority”, ang de jure head sang state, kag ang pinakamataas nga political kag religious authority sang Iran nga mas mataas pa sa presidente.

Napaidalom sa iya ang armed forces, judiciary, state radio and television, kag iban pa nga government organizations kaangay sang Guardian Council and Expediency Discernment Council.

Sandig sa constitution, ang supreme leader amo ang naga-deliher sang general policies sang Islamic Republic, naga-supervise sa legislature, judiciary, kag sa executive branches.#