France, nagapreparar sang ‘defensive’ mission sa pagbukas sang Strait of Hormuz

Gina-preparar sang France kag sang mga kaalyado sini nga pungsod ang “defensive” mission agud nga mabuksan liwat ang Strait of Hormuz kag ma-updan ang mga barko nga magalabay.

Gin-anunsyo ini ni French President President Emmanuel Macron sa Cyprus kasunod sang pag-intercept sang missiles sang Iran sa Türkiye, Qatar kag sa United Arab Emirates.

Kasunod man ini sang pagtimbuok sang presyo sang langis sa masobra $US150 kada barrel.

Suno kay Macron, ang ila escort mission nga gina-preparar ang paga-updan sang European kag non-European countries.

Tuyo sini suno sa iya nga makahatag sang suporta ukon proteksyon sa mga barko kag tankers samtang amat-amat nga ginabuksan ang Strait of Hormuz.

Nagpahayag man si Macron nga masobra 12 ka naval assets ang ila ipadala sa Mediterranean, Red Sea kag sa Strait of Hormuz lakip ang ila nga aircraft carrier strike group bilang kabahin sang defensive support sa ila mga kaalyado nga nabutang sa alang-alang bangud sa gyera.

Lakip sa ila ipadala amo ang walo ka warships, duha ka helicopter carriers kag ang nuclear-powered aircraft carrier nga Charles de Gaulle nga may 20 Rafale fighter jets agud nga makabulig sa seguridad.

Ginakabig ang Strait of Hormuz nga isa sa most critical maritime chokepoints sa kalibutan kun sa diin 20–25% sang global oil consumption kag 20% sang liquefied natural gas (LNG) ang nagalabay diri kada adlaw.

Nahamtang ini nga 33km-wide waterway sa tunga sang Iran kag Oman, kag amo ang primary exit para sa Gulf producers kaangay sang Saudi Arabia, Iraq, kag Qatar. #