Nag-abot sa Pilipinas ang dugang nga mga overseas Filipino workers (OFWs) kag ila mga pamilya nga naapektuhan sang nagasingki nga tensyon sa Middle East.
Sa report sang Department of Migrant Workers (DMW), 32 ka repatriates halin sa Oman ang nakabalik sa Pilipinas sakay sa Oman Air flight WY843.
Lakip sa sini nga numero ang 24 ka OFWs kag walo ka family dependents. Magluwas sa ila, may yara man sang apat ka OFWs halin sa Dubai kag Oman nga ginbuligan man sang gobyerno nga makapauli.
Suno sa DMW, bangud sang gyera, nagbuligay ang gobyerno kaupod ang embahada kag mga konsulado sang Pilipinas, DMW-Migrant Workers Offices, kag Overseas Workers Welfare Administration nga ma-arrange ang land transportation para nga makakadto ang mga Pinoy sa hilway nga exit points kag mga alternatibo nga airport nga bukas pa para sa international travels.
“Ang airspace sa bansang pinanggalingan nila ay very limited kaya naghanap ng paraan to cross the border sa isang bansa na makakalipad sila, and now, they’re here,” kabahin sang pahayag ni Migrant Workers Secretary Hans Leo J. Cacdac.
Nahibaluan nga masobra na sa 400 Filipinos ang nagdesisyon nga magbalik sa Pilipinas halin sang nag-umpisa ang gyera sa Middle East sang Pebrero 28, 2026.#
