Naglala pa ang tensyon sa tunga sang nagapadayon nga giyera sang Estados Unidos kag Israel kontra Iran.
Ini matapos maigo ang daku nga Pars gas field sang Iran nga kabahin sang pinakadako nga natural gas reserve sa bilog nga kalibutan.
Bilang sabat, nagpahayag ang Iran nga atakihon sini ang mga pasilidad sang mga produktong petrolyo sa Gulf, lakip ang mga target sini nga Saudi Arabia, United Arab Emirates, kag Qatar.
Bangud sini gilayon naman nga nagtaas ang presyo sang gatong sa world market, bangod sang posible nga kakulangan sa suplay sang enerhiya.
Wala pa napamatud-an kun may ara sang kahilabtanan ang Israel kag Estados Unidos sa pagpang-atake apang may mga report nga ang Israel amo ang nagpatigayon sang nasambit nga strike.
Indi naman magnubo sa 20 ang patay matapos ginbombahan sang Israel ang building nga ginapahayag nahamtangan sang mga leader sang Hezbollah sa Beirut, Lebanon.
Ginpahayag man nga pila ka mataas nga opisyal sang Iran ang nagkalamatay.
Gilayon naman nga nagbalos ang Iran paagi sa pagpalupok sang mga missile pakadto sa Israel kag sa mga base militar sang U.S. sa nagkalain-lain nga pungsod sa rehiyon.
Sa matandaan nga nauna na nga ginpasarado sang Iran ang Strait of Hormuz, nga isa ka importante nga gina-agyan sang halos 20 percent sang suplay sang gatong kag liquefied natural gas sa bug-os nga kalibutan.
Sa pinaka-ulihi nga report, ginabulubanta nga linibo na ang napatay sa Iran, ginatos sa Lebanon, kag may ara man sang nagkalamatay sa Israel kag iban pa nga mga pungsod sa Gulf samtang nagapadayon ang inaway.
