Nagtililipon sa Iloilo City ang 3,000 tubtob 4,000 ka mga delegado para sa 12th Philippine Association of State Universities and Colleges National Culture and Arts Festival (NCAF).
Ini ang gin-host sang West Visayas State University-Main Campus.
Nag-umpisa ang mga aktibidad sang Abril 6 kag magalawig tubtob sa Abril 12.
Ang tema subong nga tuig amo ang “Pagsaulog: Pagpasidungog sa Aton Panublion, Kultura kag mga Bahandi.”
Pila sa mayor nga aktibidad amo ang mga paindis-indis sa pagsaot, musika, teatro, literary arts, kag ang Mr. and Ms. PASUC NCAF 2026 pageant.
Sa interview sang Bombo Radyo kay Dr. Joselito Villaruz, iya ginpahayag nga ang numero sang delegado nga nagpadulong sa Iloilo City ang mas manubo sa orihinal nga numero nga ginabanta sa 5,000.
Suno kay Villaruz, ginbuhinan ang delegasyon bangud sa ginapangatubang subong nga krisis sa pungsod.
Pahayag niya, sa pagkamatuod, ginkonsiderar nila nga kanselahon kuntani ang PASUC apang ila narealisar nga mas mabudlayan sila bangud kalabanan sa mga delegates ang nakabakal na sang tickets sang nagligad pa nga tuig.
Gindugang naman ni Villaruz nga kalabanan sa mga venues sang mga events ang sa sulod gid sang WVSU campus apang may yara lang sang pila ka events nga patigayunon sa University of the Philippines Visayas Auditorium.
.){kind=link}