Apisar nagapasalamat ang transport group sa Iloilo City sa ila nabaton nga ayuda halin sa gobyerno, ginapanindugan nila nga dapat gid ipatuman ang pagpasaka sang plete ukon fare hike.
Sa interview sang Bombo Radyo kay Mr. Raymundo ‘Boyet’ Parcon, chairman sang Western Visayas Transport Cooperative (WVTC), iya ginpahayag nga nagapasalamat sila bangud makasapin-sapin sa ila kinahanglanon ang P1,500 nga balor sang produktong petrolyo nga ihatag sang Iloilo City Government sa weekend.
Suno kay Parcon, pila sa ila nga mga myembro ang nakabaton na sang coupons kahapon kag mapatughong na sang libre sa Sabado kag sa Domingo.
Pila man sa ila myembro ang mangin benepisyaryo sang tag-P5,000 cash assistance halin sa Department of Social Welfare and Development (DSWD). Ini ang expansion sang programa nga nagalakip na sang public utility jeepney (PUJ), taxi, kag transport network vehicle service (TNVS) drivers kasunod sang initial rollout sang Myerkules nga eksklusibo lang para sa tricycle drivers and operators sa tatlo ka syudad sa Western Visayas.
Magluwas diri, may ginapaabot man nga cash aid halin sa Department of Transportation (DOTr) nga ginalauman nga magaabot subong nga semana.
Sa pihak sini, gintawag ni Parcon nga “band aid solution” lamang ang subsidiya nga ginahatag. Ginsulit sini nga ang ila ginapangayo sa gobyerno amo nga aprubahan ang pagpasaka sang plete.
“Indi solusyon ang fuel subsidy sa amon problema subong,” suno kay Parcon. Subong gani, negative kami kada adlaw. Amo na hambal ko sang nagligad nga nagapamyerdehan kami sang sobra P100,000 kada adlaw.”
Pahayag sini, wala pa sila sang update nga nakuha gikan sa Land Transportation Franchising and Regulatory Board Region VI apisar nga lapitanay lang ang ila opisina.
“Ginahulat-hulat namon ang approval sang DOTr kay bisan lima lang tani ka pesos [nga fare hike], pero makadugang-dugang tani sa amon kita,” dugang sini.
Matandaan nga sang nagligad nga bulan, nagpatigayon man ang mga transport cooperative sa Iloilo City sang transport strike agud nga ipanawagan ang amo nga kawsa.#
